Í öllum aðstæðum í lífinu þurfum við að hugsa til náungans þegar við erum í hóp, við erum jú ekki ein þegar við erum í hóp 😉

Í tilefni af því að Gullhringurinn götuhjólakeppni í hópstarti er núna um helgina og ég veit að það eru margir nýjir hjólarar að fara að taka þátt þá setti ég niður nokkur grunnatriði sem gott er að hafa á bak við eyrað þegar hjólað er í hóp.

– Einbeittu þér að því að hjóla beint, náunginn fyrir aftan þig treystir á það.
– Staðsettu hendur þannig á stýrinu að þú náir vel í bremsur, því þá ert þú fljótari að bregðast við ef einhvað óvænt gerist innan hópsins.
– Varastu að gera snöggar hreifingar, hraðabreytingar eða taka í bremsur innan hópsins af tilefnislausu.
– Þegar þú ferð fremst í vindinn og hópurinn er að vinna saman, ekki gefa allt í botn (kallast að rikkja) því þá koma teygjuáhrif og leiðinlegar hreyfingar á hópinn. Farðu heldur fremst og auktu hraðann smám saman ef þú getur.
– Vegirnir á íslandi eru allskonar, skemmdir í köntum, holur eða viðgerðir í götunni osfv. Horfðu lengra fram fyrir þig, líka þegar þú ert ekki fremst í hópnum, horfðu þá reglulega fram fyrir hópinn og vertu vakandi fyrir því sem er framundan.
– Varaðu þá sem eru fyrir aftan þig við áreitum, skemmdum í malbikinu osfv sem koma með handabendingum eða kalli.
– Ef þú ert óörugg/ur að ná í brúsann til að fá þér að drekka, farðu þá aftast í hópinn og náðu þér í brúsann þar, þú skapar þannig minni hættu fyrir hópinn ef þú ert að klaufast með þetta.
– Hafðu bremsurnar í lagi og prófaðu þær áður en þú leggur af stað í keppnina. Þó þær séu í lagi heima þá getur einhvað komið upp eftir að hafa troðið hjólinu inn í eða utan á bílinn.
– Þú átt að sjálfsögðu aldrei að hafa tónlist í eyrunum þegar þú hjólar í hóp.
– Við hjólum aldrei á öfugum vegarhelming, þó það væri hentugt til að ná því að vera í kjölsogi/draft eða fara framúr.

Það er mun skemmtilegra að hjóla í hóp, um það snýst jú líka hópstart. Reynið að ná því að vera í hóp og vinnið saman EN reynið líka að sigra alla þá sem eru með ykkur í hópnum, þetta er jú keppni 😉

Ég hvet fólk síðan til þess að taka gott hópknús eftir keppnina á laugardaginn 😀
Sjáumst í Gullhringnum í glimrandi veðri á Laugarvatni á laugardaginn 11 júlí 2015
Kveðja María Ögn
Hjólaþjálfari